एमएस नेपालको प्रभाव मूल्याङ्कन

माधव अर्याल
पाल्पा मंसिर १८
डेनिस सहयोग नियोग एमएस नेपालका साझेदार संस्थाहरु सामाजिक स्रोत विकास केन्द्र पाल्पा, महिला कल्याण संघ पाल्पा र सामुदायिक रेडियो मदनपोखरा को प्रभाव मूल्याङ्कन कार्यक्रम बुधबार सम्पन्न भएको छ।
जनता प्रावि पोखराथोकमा भएको कार्यक्रममा हालसम्म गरिएका कार्यहरुको सार्वजनिक गरिनुका साथै आगामी कार्यक्रमको बारेमा छलफल गरिएको थियो।
विशिष्ट अतिथि डेनिस राजदुत फिन टिन्स्टेडले नेपालमा राजाले शासन लिएपछि असमानताको स्थित सृजना भएको बताए। कार्यक्रमपछि स्थानीय कुमाल समुदायसग भएको अन्तरक्रियामा राजदुतले दाइजो प्रथा र समाजिक रुपान्तरणबारे अन्तरक्रिया गरेका थिए। दाईजो प्रथाले गर्दा समाज विकासको क्षेत्रमा अगाडि बढ्न नसकेको उनले बताए।
एमएस नेपालका कन्ट्री डाइरेक्टर स्टेन एडर्सनले समुदाय रुपान्तरणका लागि गरिएका कार्य देख्न र सुन्न पाउँदा खुसी लागेको बताउँदै केन्द्रका राजनीतिक दलले स्थानीय स्तरबाटै कार्यक्रम सञ्चालन गर्नुपर्ने र स्थानीय स्तरका जनताको पहूँच सरकारसम्म हुनुपर्ने बताए।
कार्यक्रममा मिलनसार महिला समूहकी रुपा कुमाल सृजनशील महिला समूहकी हुमा बगाले, हटिया महिला समूहकी माया गौतम, सुसेली रेडियो संगी समूहका दानप्रसाद गैरे, प्रगतीशील रेडियो संगी समूहका तुलबहादुर कुमाल, चादनी समूहकी आइटी कुमालले आ–आफ्नो संस्थाको कार्यप्रगति प्रतिवेदन पेश गरेका थिए। रेडियो संगी समुहका हरि प्रसाद पराजुलीको संचालन र शर्मीला कुमालको स्वागत मन्तव्यबाट सुरु भएको कार्यक्रम यमकला कुमालको सभापतित्वमा भएको थियो।